Traumatismos

Craniais: xeneralidades

Traumatismo craneoencefálico:

O obxectivo principal da avaliación clínica e radiolóxica é identificar aqueles pacientes con traumatismos craneoencefálicos graves, dende un punto de vista clínico, e, aínda máis importante, aqueles cun hematoma intracranial que necesitan un tratamento neurocirúrxico urxente.
Estímase que en Inglaterra e Gales hai unhas 700.000 consultas hospitalarias ao ano por traumatismos craneoencefálicos. A maior parte deles considéranse leves, con baixo risco de hematoma intracranial. As prácticas máis recentes no Reino Unido apoian o uso da radiografía do cranio para realizar a triaxe de pacientes con traumatismos craneoencefálicos leves, aínda que a sensibilidade para detectar hematomas intracraniais pode ser de só o 38%. A TC ten unha sensibilidade e unha especificidade próximas ao 100%, pero conleva unha alta carga de radiación e importantes repercusións económicas se se utiliza indiscriminadamente.
Houbo varios intentos de elaborar unhas normas de decisión clínica co fin de identificar pacientes que non teñan ningún risco de padecer hematomas neurocirúrxicos u outros traumatismos encefálicos clinicamente importantes e que non necesiten de técnicas por imaxe. A Regra Canadense de TC de cabeza foi elaborada a partir dunha cohorte de máis de 3.000 pacientes a través dunha metodoloxía de análise multivariante de varios factores de risco. A priori consideráronse indicacións a coagulopatía, un déficit neurolóxico focal, convulsións postraumáticas e a sospeita clínica de fractura cranial aberta ou con afundimento. Outros cinco factores de risco clínico identificaron ao 100% dos pacientes que necesitaron unha intervención neurocirúrxica, e outros dous factores que identificaron o 98,4% dos pacientes con traumatismos craneoencefálicos clinicamente importantes.
No momento da publicación de esta Guía a avaliación para validar esta regra aínda non rematara, polo que supoñen unha proba de nivel 2 de evidencia. Esta Guía adopta a Regra Canadense acerca da TC cranial como base para realizar a selección de pacientes para realizarlles unha TC, pero este aspecto está suxeito aos cambios que poidan xurdir das novas evidencias que vaian aparecendo.
Se a TC é normal ou o paciente non é apto para unha exploración por TC e non existen outros factores clínicos de risco ou factores sociais, o risco de que xurdan complicacións que necesiten unha atención hospitalaria é o suficientemente baixo como para poder dar a alta e encargar o coidado a un adulto responsable que poida seguir as instrucións indicadas para casos de lesións deste tipo.
Estas recomendacións aumentarán con toda probabilidade o uso da TC para traumatismos craneoencefálicos na maioría dos centros sanitarios do Reino Unido. Isto ten repercusións tanto nas doses de radiación como nos custos, aínda que a TC de rutina seguida da alta do paciente se a TC é negativa, pode ser custo-efectiva. Os protocolos das exploracións por TC deben ser optimizados para minimizar a dose, especialmente en nenos.
As recomendacións actuais do Royal College of Surgeons (Real Colexio de Cirurxiáns) afirman que todos os servizos que reciban pacientes con traumatismos craneoencefálicos deben dispoñer de equipos de TC as 24 horas. En casos concretos nos que, pola razón que sexa, non haxa un equipo de TC dispoñible de inmediato, a radiografía de cranio pode ser de utilidade. Outras circunstancias especiais e/ou locais poden comportar unha modificación destas recomendacións.
A RM, a SPECT e a ecografía Doppler transcranial son probas especializadas cuxo papel no traumatismo craneoencefálico está aínda en avaliación.

Lesións asociadas:

En todos os pacientes con traumatismos craneoencefálicos está indicado realizar unha avaliación da columna cervical, incluídas probas de imaxe se están indicadas (véxase seccións K7-K11). Debe considerarse a posibilidade de levar a cabo a TC cervical mentres se lle realiza ao paciente a cranial, especialmente se o paciente está inconsciente. A TC multicorte permite ver toda a columna cervical con alta resolución e xerar reformateos multiplanares con relativa facilidade. A sensibilidade para detectar fracturas é superior á da radiografía simple.
As fracturas do cóndilo occipital son pouco frecuentes, pero as lesións graves están asociadas a traumatismos contusos de alta enerxía na cabeza e/ou a columna cervical. Son difíciles de diagnosticar clinicamente, aínda que deben sospeitarse en calquera paciente que mostre signos de parálise dos nervios craniais inferiores tras a lesión. Su demostración nunha radiografía simple é extremadamente difícil, e o diagnóstico radiolóxico necesita unha TC de boa calidade. Esta zona debe controlarse de forma rutineira a través de "ventás óseas" nos pacientes con traumatismos craneoencefálicos, con imaxes de alta resolución complementarias se fose necesario.

Nenos:

A Regra Canadense elaborouse sen incluír nenos. Os nenos teñen un risco menor que os adultos de padecer un hematoma intracranial, polo que se considera seguro aplicar esta regra neste grupo de idade. Se se sospeita lesión non accidental, é necesario realizar unha radiografía do cranio como parte do estudo óseo. En nenos de entre 0 e 2 anos, a TC de cranio é obrigatoria. Ademais, pode ser necesaria máis tarde unha RM do cerebro para documentar a cronoloxía da lesión.

(Para lesións non accidentais en nenos, véxase M15)

Lesións craneoencefálicas leves:

Os pacientes con traumatismos craneoencefálicos que están completamente orientados, que non perderon a conciencia nin sufriron amnesia e non teñen outros factores clínicos de risco, teñen un risco desprezable de padecer unha lesión cerebral clinicamente importante e non requiren técnicas de imaxe.

Código	CIAP2	Problema clínico	Exploración	Recomendación [Grao]	Comentario	Dose
Traumatismo na cabeza
K01	A80 A81 L76 N79 N80	Calquera das seguintes situacións clínicas indica que existe risco de lesión cerebral clinicamente importante que necesita intervención neurocirúrxica: Glasgow <13 en calquera momento dende a lesión Glasgow 13 ou 14 con fallo de recuperación dun Glasgow 15 nun prazo de 2 horas tras a lesión Sospeita de fractura cranial aberta ou fundida Calquera signo de fractura cranial basal (hemotímpano, "ollos de mapache", otorrea de LCR, signo de Battle: hematoma retroauricular) Máis dun episodio de vómitos Idade superior a 64 anos Convulsións postraumáticas Coagulopatía, incluído o tratamento anticoagulante Déficit neurolóxico focal As dúas situacións seguintes en ausencia de calquera das arriba sinaladas indican que existe risco de lesión cerebral clinicamente importante que non necesita intervención neurocirúrxica: Amnesia retrógrada de máis de 30 minutos Lesión producida de xeito violento: atropelo dun peón por un vehículo de motor, ocupante que sae despedido dende o interior dun vehículo de motor, caída dende unha altura superior a 1 metro	RXC	Non indicada [B]	Cando a TC non está dispoñible pódese xustificar o uso de RXC para realizar unha triaxe. Existe unha excepción importante no caso de sospeita de lesión non accidental en nenos, xa que a RXC de rutina está indicada como parte do estudo óseo. En nenos de entre 0 e 2 anos, a TC do cranio é obrigatoria. (Para lesións non accidentais en nenos, véxase M15)	I
K01	A80 A81 L76 N79 N80		TC	Indicada [B]	A TC debe realizarse en 1 hora, agás en casos de pacientes que só presentan amnesia retrógrada de máis de 30 minutos e/ou lesións producidas de forma violenta como factores de risco. Estes pacientes non teñen risco de hematoma que necesite intervención cirúrxica, polo que a TC pode pospoñerse ata 8 horas. Se o Glasgow descende 1 punto, especialmente na puntuación motora, é necesaria unha TC urxente. Se un paciente con TC inicialmente normal non recupera un Glasgow 15 en 24 horas, pode ser adecuado realizar unha nova TC ou RM.	II
Cara e órbitas
K02	A80 A81 L76	Traumatismo nasal	RXC / RX dos ósos da cara / RX dos ósos nasais	Non indicadas [B]	As RX non son fiables para diagnosticar fracturas nasais e, mesmo cando son positivas, non adoitan influír no tratamento do paciente. Debe consultarse cun servizo de ORL ou de cirurxía máxilofacial, dependendo das pautas locais.	I / I / I
K03	A80 A81 F75 F79 L76	Traumatismo orbitario pechado	RX dos ósos da cara	Indicada [B]	Especialmente cando se sospeita lesión por estalido. Algúns especialistas poden pedir unha RM ou unha TC coronal directa en caso de diplopía persistente ou cando a RX e os signos clínicos son dubidosos.	I
K04	A80 A81 F76 F79	Traumatismo orbitario penetrante (Véxase tamén A16, A17)	RX da órbita	Indicada [B]	Indicada se se sospeita corpo estraño radiopaco (metálico) intraorbitario.	I
			TC	Exploración especializada [B]	Indicada se se sospeita corpo estraño pouco opaco (pequeno ou non metálico) intraorbitario.	II
			Ecografía	Exploración especializada [B]	Indicada nos casos de corpos estraños intraoculares anteriores.	0
			RM	Exploración especializada [B]	Perigosa en caso de corpos estraños metálicos intraoculares. É necesaria unha exploración especializada en casos nos que existe unha alta sospeita clínica pero non é posible localizar ou identificar o corpo estraño por medio doutra técnica por imaxe.	0
K05	L76	Lesión do terzo medio facial	TC	Exploración especializada [B]	A cooperación do paciente é fundamental para obter imaxes de calidade diagnóstica. Se o paciente non coopera, é mellor atrasar a proba.	II
K05	L76	Lesión do terzo medio facial	RX dos ósos da cara	Indicada [B]	Consulte co cirurxián máxilofacial, que pode pedir enseguida unha TC a dose baixa nunha fase precoz no manexo de lesións complexas.	I
K06	A80 A81 L07 L76	Traumatismo mandibular	RX da mandíbula ou OPG (RX panorámica)	Indicada [A]	A RX panorámica non é apropiada para pacientes que non cooperen ou con lesións múltiples.	I
Columna cervical
K07	A80 A81 L01 L76 L83 N79 N80	Paciente consciente con traumatismo en cabeza e/ou cara exclusivamente	RX da columna cervical	Indicada só en circunstancias específicas [A]	A RX non é necesaria, sempre que se reúnan estes cinco criterios: Non dor cervical na liña media Non déficit neurolóxico focal Estado de alerta normal Non signos de intoxicación Non lesión dolorosa ou molesta	I
K08	A80 A81 L01 L76 L83 N79 N80	Paciente inconsciente con lesión cranial	RX da columna cervical, TC	Indicada [B]	Unha RX de boa calidade debería poñer de manifesto toda a columna cervical ata a D1/2. Se a unión cérvico-torácica non se ve claramente ou hai posibles áreas de fractura é necesario realizar unha TC. Sempre que estea dispoñible, a TC helicoidal pode usarse como alternativa á RX e é fundamental se a unión cérvico-torácica non se ve claramente na RX. Ambas técnicas poden ser difíciles en pacientes con traumatismos graves e debe evitarse a manipulación.	I, II
K09	A80 A81 L01 L76 L83	Lesión dolorosa do colo	RX da columna cervical	Indicada [B]	Consulte cos servizos de radioloxía clínica.	I
K09	A80 A81 L01 L76 L83	Lesión dolorosa do colo	TC / RM	Exploración especializada [B]	Pode ser útil cando a RX é equívoca ou a lesión é complexa.	II / 0
K10	A80 A81 L01 L76 L83 N28 N81	Lesión do colo con déficit neurolóxico	RX da columna cervical	Indicada [B]	Para a avaliación ortopédica. A RX debe ser de boa calidade para permitir unha interpretación precisa.	I
			RM	Indicada [B]	A RM é o mellor método e o máis seguro para poñer de manifesto afectacións intrínsecas medulares, compresión medular, lesións de ligamentos e fracturas vertebrais a distintos niveis. Existen algunhas restricións con sistemas de soporte vital.	0
			TC	Exploración especializada [B]	A MieloTC pode usarse se a RM non é realizable.	II
K11	A80 A81 L01 L76 L83	Lesión dolorosa do colo, pero cunha RX normal nun principio; sospeita de lesión ligamentosa	RX da columna cervical	Exploración especializada [B]	Proxeccións na flexión e na extensión (considérese a radioscopia) que lle sexa posible ao paciente sen axuda e baixo control médico.	I
K11	A80 A81 L01 L76 L83		RM	Exploración especializada [C]	A RM pon de manifesto as lesións ligamentosas.	0
Columna dorsal e lumbar
K12	A80 A81 L76 L84 L86	Traumatismo sen dor nin déficit neurolóxico	RX	Non indicada [A]	Nesta rexión, a exploración física é fiable. Cando o paciente está alerta e asintomático, sen signos neurolóxicos, a probabilidade de achados radiolóxicos que alteren a actitude terapéutica é baixa.	I
K13	A80 A81 L76 L84 L86	Traumatismo con dor, pero sen déficit neurolóxico, ou non foi posible analizar a situación do paciente	RX	Indicada [B]	O umbral para a RX é baixo cando hai dor na palpación, unha caída ou un accidente de circulación importantes, outra fractura vertebral ou se non pode procederse á avaliación clínica do paciente. Se as RX mostran inestabilidade ou fracturas do elemento posterior, a TC ou a RM son fundamentais.	I
K14	A80 A81 L76 L84 L86 N81	Traumatismo: con déficit neurolóxico, con ou sen dor	RX	Indicada [B]	Exploración inicial, aínda que a TC / RM é fundamental.	I
			TC	Indicada [B]	A TC permite unha análise detallada das lesións óseas, con ou sen reconstrución.	II
			RM	Indicada [B]	A RM da columna completa está indicada cando existen lesións de ligamentos ou de múltiples niveis e lesións da "cola de cabalo".	0
Pelve e sacro
K15	A80 A81 L13 L75 L76	Caída con incapacidade para cargar peso	RX de pelve e RX lateral da cadeira	Indicada [C]	A exploración física pode non ser fiable. Explore para ver se hai fracturas do colo do fémur, que poden non observarse na RX inicial aínda con boas proxeccións laterais. Nalgúns casos a MN, a RM ou a TC poden ser útiles se a RX é normal ou dubidosa.	I + I
K16	A80 A81 L13 L76 U06 U80	Hemorraxia uretral e lesión pélvica	Uretrografía retrógrada	Indicada [C]	Para poñer de manifesto a integridade uretral, unha fuga ou unha rotura. Se a uretra é normal e hai hematuria, considérese a realización dunha cistografía ou unha TC tardía post-contraste para avaliar outras posibles lesións no tracto urinario. Cada vez utilízase máis a RM como primeira exploración en casos non agudos.	II
K17	A80 A81 L13 L76 L84 L85 L86	Traumatismo ou dor no cóccix	RX	Indicada só en circunstancias específicas [C]	A aparencia de normalidade adoita ser enganosa. Os achados non modifican o manexo.	I
Membro superior
K18	A80 A81 L08 L76 L80 L92	Lesión de ombro	RX	Indicada [B]	Algunhas luxacións presentan achados sutís. Se necesitan, como mínimo, proxeccións ortogonais. A ecografía, a RM e a TC poden desempeñar un papel en casos complexos ou de lesións de partes brandas. Considérese a avaliación do manguito dos rotadores en maiores de 50 anos que teñen pouca mobilidade tras unha primeira luxación.	I
K19	A80 A81 L10 L72 L79	Lesión do cóbado	RX	Indicada [B]	Para detectar derramo. As RX de control rutineiro non están sistematicamente indicadas cando hai un derramo sen evidencia de fractura. A RM é unha exploración especializada.	I
K20	A80 A81 L11 L76	Lesión no pulso: sospeita de fractura de escafoide	RX	Indicada [B]	Se se sospeita de fractura do escafoide, é necesario realizar unha serie de catro proxeccións.	I
K20	A80 A81 L11 L76	Lesión no pulso: sospeita de fractura de escafoide	RM / MN / TC	Indicada [B]	Se a dúbida clínica persiste, as exploracións por RM/MN/TC son fiables. Prefírese a RM porque é máis específica. Cada vez úsase máis a RM como única exploración.	0 / II / II
Membro inferior
K21	A80 A81 L15 L73 L76 L78 L96	Lesión do xeonllo (caída / traumatismo contuso)	RX	Indicada só en circunstancias específicas [B]	Cando o traumatismo pechado ou unha caída son as causas da lesión. A RX é necesaria cando se trata de pacientes < 12 ou > 50 anos ou pacientes que non podan subir catro chanzos levando peso (apoiando). Pode ser necesaria unha TC ou unha RM se se require máis información.	I
K22	A80 A81 L16 L73 L77	Lesión aguda do nocello	RX	Indicada só en circunstancias específicas [B]	As situacións que xustifican a realización dunha RX son: incapacidade para cargar peso (apoiar) no momento inmediato e na sala de urxencias, puntos dolorosos á palpación no maléolo medial e/ou no borde posterior e pico distal do maléolo lateral.	I
K23	A80 A81 L17 L74	Lesión do pé	RX	Indicada só en circunstancias específicas [A] Tarso [B] Metatarso	Só indicada se hai verdadeira dor ósea á palpación ou incapacidade progresiva para cargar peso (apoiar). Demostrar unha lesión metatarsiana raramente inflúe no tratamento. Raramente está indicado realizar RX de pé e nocello conxuntamente. Nin unha nin outra deben realizarse sen ter boas razóns. Se non se realizan as RX, aconselle ao paciente que volva nunha semana se é que os síntomas non melloran. En caso de lesións complexas do tarso necesítase unha TC.	I
K24	L72 L73 L74 L75 L76 L99	Fractura de estrés	RX	Indicada [B]	Aínda que a miúdo non da resultados.	I
K24	L72 L73 L74 L75 L76 L99	Fractura de estrés	MN / RM / TC	Indicada [B]	Son unha ferramenta de detección precoz e permiten visualizar as propiedades biomecánicas do óso. Algúns servizos utilizan a ecografía.	II / 0 / II
Corpo estraño
K25	L81 S15	Lesión de partes brandas: corpo estraño (metal, vidro, madeira pintada)	RX	Indicada [B]	O vidro é sempre radiopaco. Retire primeiro os apósitos manchados de sangue ou as vestimentas sucias.	I
K25	L81 S15		Ecografía	Indicada [B]	A ecografía pode estar indicada en caso de corpo estraño radiotransparente ou cando a RX é difícil.	0
K26	L81 S15	Lesión de partes brandas: corpo estraño (plástico, madeira)	RX	Indicada só en circunstancias específicas [B]	O plástico non é radiopaco e a madeira raras veces éo.	I
K26	L81 S15	Lesión de partes brandas: corpo estraño (plástico, madeira)	Ecografía	Indicada só en circunstancias específicas [B]	A ecografía de partes brandas pode evidenciar un corpo estraño non radiopaco.	0
K27	D79 R87	Inxestión de corpo estraño que pode estar aloxado na orofarinxe ou na zona esofáxica superior (Véxase tamén K28 e K29) (Para os nenos, véxase a sección M)	RX	Indicada só en circunstancias específicas [C]	Despois da exploración visual da orofarinxe (onde se aloxan case todos os corpos estraños) e se se sospeita que o corpo estraño é radiopaco. Pode ser difícil distinguilo dunha cartilaxe calcificada. Case todas as espinas de pescado son invisibles por RX.	I
K27	D79 R87		RXA	Indicada só en circunstancias específicas [B]	Non dubide en proceder a unha laringoscopia ou endoscopia, especialmente se a dor persiste ao cabo de 24 horas. (Para inxestión de corpo estraño nos nenos, véxase M26, M31)	II
K28	D79 R87	Inxestión de corpo estraño liso e pequeno (por exemplo, unha moeda)	RXT	Indicada [B]	Poucos corpos estraños inxeridos son radiopacos. En nenos, debería ser suficiente unha RXT frontal lixeiramente sobreexposta que inclúa o colo. En adultos, pode ser necesaria unha RXT lateral se a póstero-anterior é negativa.	I
K28	D79 R87		RXA	Indicada só en circunstancias específicas [B]	A maior parte dos corpos estraños se aloxan a nivel do músculo cricofarínxeo. Se o corpo estraño non se evacuou ao cabo duns 6 días, unha RXA pode ser útil para a súa localización.	I
K29	D79 R87	Inxestión de corpo estraño punzante ou posiblemente velenoso (por exemplo, unha pila) (Para os nenos véxase a sección M)	RXA	Indicada [B]	A maior parte dos corpos estraños inxeridos que atravesan o esófago acaban percorrendo o resto do tubo dixestivo sen complicacións. É importante localizar as pilas, porque un escape pode ser perigoso.	I
K29	D79 R87		RXT	Indicada só en circunstancias específicas [B]	Só indicada se a RXA é negativa. (Para os nenos, véxase M31)	I
Tórax
K30	A80 A81 L81	Traumatismo torácico leve	RXT	Indicada só en circunstancias específicas [B]	Demostrar unha fractura costal non modifica a actitude terapéutica.	I
K31	A80 A81 L81	Traumatismo torácico moderado	RXT	Indicada [B]	RXT póstero-anterior para pneumotórax, derramo ou contusión pulmonar.	I
K31	A80 A81 L81	Traumatismo torácico moderado	TC	Exploración especializada [C]	Pode ser necesaria.	III
K32	A80 A81 L81 S18	Ferida punzante	RXT	Indicada [C]	Proxeccións posteoanteriores e outras para poñer de manifesto un pneumotórax, afectación pulmonar ou derramo. A ecografía é útil para derramo pleural ou pericárdico.	I
K33	L76	Fractura esternal	RX lateral do esterno	Indicada [C]	Ademais da RXT, necesítase unha RX lateral do esterno. Pense tamén en lesións da columna dorsal e da aorta torácica.	I
Abdome (incluído o ril)
K34	A80 A81 S16	Traumatismo pechado ou ferida penetrante	RXA en decúbito supino e RXT en bipedestación / ecografía	Indicada [B]	A RXA en decúbito supino e a RXT en bipedestación están indicadas. A ecografía é útil para detectar un hematoma e posibles lesións de algúns órganos, como o bazo ou o fígado.	I / I / 0
K34	A80 A81 S16	Traumatismo pechado ou ferida penetrante	TC	Exploración especializada [C]	Pode necesitarse unha TC.	III
K35	A80 A81 U80	Traumatismo renal (Véxase tamén N27)	UIV	Indicada só en circunstancias específicas [B]	En adultos con traumatismo renal pechado, hematuria microscópica e sen shock ou lesións graves intrabdominais asociadas pode evitarse sen problema a realización de probas de imaxe.	II
			Ecografía	Indicada só en circunstancias específicas [B]	A ecografía pode ser útil para unha primeira avaliación de pacientes con sospeita de lesión renal, pero unha ecografía negativa non a descarta.	0
			TC	Indicada [B]	A TC é a técnica de elección para pacientes con traumatismo importante ± hipotensión, ± hematuria macroscópica. Débese incluír unha TC tardía (fase excretora) para avaliar o sistema colector.	III
Traumatismo grave
K36	A80 A81 L81 N80 N81	Traumatismo grave: exame sistemático do paciente inconsciente ou confuso (Véxase tamén K01, K37, K38 e N27)	RX da columna cervical / RXT / RX de pelve / TC da cabeza	Indicadas [B]	A prioridade é estabilizar a situación do paciente. Procederase unicamente ás RX mínimas necesarias para a avaliación inicial. Para a RX da columna cervical pode esperarse ata que a columna e a medula estean convenientemente protexidas. As fracturas pélvicas adoitan estar acompañadas de hemorraxias maiores.	I / I / I / III
K37	A80 A81 B76 B77 D80 L81 U80 X82 Y82	Traumatismo grave de abdome ou pelve (Véxase tamén N27)	RXT, RX de pelve	Indicadas [B]	Hai que descartar pneumotórax. As fracturas pélvicas con aumento do volume pélvico adoitan acompañarse de hemorraxia abundante.	I + I
K37	A80 A81 B76 B77 D80 L81 U80 X82 Y82	Traumatismo grave de abdome ou pelve (Véxase tamén N27)	Ecografía / TC	Indicadas [B]	Sensible e específica, pero leva tempo e pode atrasar a entrada no quirófano. A TC debe preceder ao lavado peritoneal. Vai aumentando o uso da ecografía no servizo de urxencias para poñer de manifesto líquido libre peritoneal e lesións de órganos sólidos. A ecografía substituíu ao lavado en case todos os casos, pero ten unha sensibilidade baixa para detectar lesións esplénicas. Se a dúbida persiste, a TC debe seguir á ecografía.	0 / III
K38	A80 A81 B77 L81 R88	Traumatismo torácico grave	RXT	Indicada [B]	Permite o tratamento inmediato (por exemplo, do pneumotórax).	I
K38	A80 A81 B77 L81 R88	Traumatismo torácico grave	TC de tórax	Indicada [B]	Especialmente útil para descartar unha hemorraxia mediastínica e unha lesión da aorta. Non dubide en proceder a unha arteriografía.	III