Moitos dos problemas clínicos relacionados co diagnóstico do cancro víronse xa, en parte, nas seccións dedicadas aos distintos sistemas e aparatos. Presentamos aquí unhas breves notas sobre a utilización da imaxe no diagnóstico, a estadificación e o seguimento dalgúns dos tumores malignos primarios máis frecuentes. Non se inclúen os tumores pediátricos, pois o seu tratamento realízano sempre os especialistas. (Para o cancro de mama, véxase a sección J). Unha RXT é necesaria cando o paciente acude por tumores malignos para detectar posibles metástases pulmonares. A RXT tamén forma parte de moitos protocolos de seguimento (por exemplo, lesións testiculares). Adoitan ser precisos exames complementarios para valorar a evolución da enfermidade (por exemplo, tras quimioterapia). Algúns deles efectúanse para protocolos de ensaios, máis que pola súa necesidade clínica, pero deben estar debidamente xustificados. De modo xeral, nesta sección é menos relevante preocuparse pola radiación debida ás técnicas de diagnóstico pola imaxe.
Código | CIAP2 | Problema clínico | Exploración | Recomendación [Grao] | Comentario | Dose |
---|---|---|---|---|---|---|
Boca e farinxe | ||||||
L01 | A79 D77 D78 R85 | Diagnóstico | RM / TC | Indicadas [B] | O diagnóstico realízase normalmente polo exame clínico, complementado con RM e TC cando se sospeita dalgunha enfermidade oculta. | 0 / II |
L02 | A79 D77 D78 R85 | Estadificación | RM / TC | Indicadas [B] | Non adoita ser necesario recorrer a técnicas por imaxe para realizar o diagnóstico. A estadificación debe incluír grupos de ganglios cervicais; a eco-Doppler de cor pode mellorar a estadificación N. O tórax debe examinarse a través de RX ou, preferiblemente, de TC, pero non se probou a efectividade clínica para a estadificación M. | 0 / II |
PET | Exploración especializada [C] | Para identificar enfermidade recorrente (recidivas) en pacientes previamente tratados. | IV | |||
Parótide | ||||||
L03 | D77 | Diagnóstico | Ecografía | Indicada [B] | Útil para identificar tumores de lóbulo superficial. Se unha PAAF é necesaria, pode usarse a ecografía como guía. Se a ecografía non permite visualizar o tumor ao completo, entón debe elixirse a RM como exploración para comprobar a extensión tumoral. | 0 |
RM / TC | Exploración especializada [B] | Prefírese a RM para avaliar masas nas parótides. As limitacións en canto á capacidade de identificar unha posible calcificación fan que a TC sexa mellor en casos de enfermidade inflamatoria. A RM non pode diferenciar claramente entre lesións benignas e malignas e non obvia a necesidade dun diagnóstico histolóxico en casos indeterminados. Non obstante, a RM é mellor que a TC en canto á resolución en tecidos brandos. As amálgamas dentais tamén poden ser un problema para a TC. A TC debe usarse se a RM é impracticable e en caso de sospeita de enfermidade inflamatoria. | 0 / II | |||
PET | Non indicada [B] | A PET non é moi útil á hora de diferenciar entre lesións benignas e malignas. | IV | |||
L04 | D77 | Estadificación | RM / TC | Indicada [B] | Debe utilizarse preferentemente a RM ante a TC para a estadificación de masas nas parótides, posto que ten maior resolución dos tecidos brandos, capacidade de obter múltiples planos e capacidade para definir tanto o tamaño da enfermidade como a afectación intracranial. | 0 / II |
PET | Exploración especializada [C] | Pode desempeñar un papel á hora da estadificación de tumores, posto que identifica as metástases nos ganglios linfáticos de tamaño normal. | IV | |||
Larinxe | ||||||
L05 | R85 | Diagnóstico | TC / RM | Indicada só en circunstancias específicas [B] | Diagnóstico clínico por endoscopia e biopsia. | II / 0 |
L06 | R85 | Estadificación | TC / RM | Indicada [B] | Sempre que estea dispoñible, a RM é preferible á TC para a estadificación T do tumor. Ambas as dúas poden utilizarse para a estadificación N. | II / 0 |
Ecografía | Exploración especializada [B] | Pode usarse para a estadificación T e N, así como para o seguimento, nos servizos especializados apropiados. | 0 | |||
Glándula tiroidea | ||||||
L07 | T71 | Diagnóstico | MN | Indicada [B] | Para a detección de cancro diferenciado de tiroide residual/recorrente (recidiva) despois dunha tiroidectomía. | II |
Ecografía | Indicada [B] | Utilizada en combinación coa PAAF, ou para guiala. | 0 | |||
L08 | T71 | Estadificación | TC / RM | Indicadas [B] | Para avaliar tumores primarios grandes, detectar metástases a distancia e en caso de carcinoma medular de tiroides en síndromes de neoplasia endócrina múltiple. | II / 0 |
MN | Indicada [B] | Para a detección de enfermidade residual/recorrente (recidiva) despois dunha tiroidectomía. | IV | |||
Ecografía | Indicada [B] | Cando se dispón de especialistas expertos. | 0 | |||
Pulmón | ||||||
L09 | R84 | Diagnóstico (Véxase tamén N29-N31) |
RXT | Indicada [A] | O cancro de pulmón pode presentarse clinicamente de formas diferentes e, se existe a sospeita, a RXT está indicada. Parte destes cancros non se poñen de manifesto nas RX, a pesar da presenza de células malignas no esputo. | I |
TC | Indicada [B] | Aínda non se probaron as vantaxes da TC como ferramenta para o cribado do cancro de pulmón. A TC aumenta a sensibilidade de detección de tumores temperás. | III | |||
L10 | R84 | Estadificación | TC | Indicada [A] | Cando se complementa con achados histolóxicos, a TC ten unha precisión global de máis do 80% para detectar linfadenopatía mediastínica. Nalgúns casos, necesítase unha biopsia dos ganglios linfáticos mediastínicos para confirmar os achados da TC antes de realizar unha toracotomía. A PET é máis precisa (véxase abaixo). | III |
RM | Indicada só en circunstancias específicas [C] | Para a maioría dos pacientes con cancro de pulmón a RM non ofrece ningunha vantaxe sobre a TC. Non obstante, é útil para pacientes con tumor no vértice pulmonar (tumor de Pancoast). A RM tamén pode ser útil para poñer de manifesto a anatomía vascular do mediastino en pacientes alérxicos aos medios de contraste iodados. Comprobouse que a RM é mellor que a TC para diferenciar un tumor dunha atelectasia distal. | 0 | |||
PET | Indicada [B] | É significativamente máis precisa que a TC ou que a RM na estadificación de pacientes con cancro de pulmón de células non pequenas e ten un alto valor predictivo negativo de metástases ganglionares. | IV | |||
Esófago | ||||||
L11 | D77 | Diagnóstico | Esofagograma | Indicada [B] | Previa á endoscopia en disfaxia, o esofagograma con contraste de bario é sensible para o diagnóstico do cancro de esófago. | II |
L12 | D77 | Estadificación | TC | Indicada [B] | Moitos pacientes preséntanse cunha enfermidade avanzada inoperable. A TC pode usarse como exploración inicial para descartar a estes pacientes. A ecografía endoscópica é necesaria para unha estadificación TNM máis precisa, especialmente se esta modifica a abordaxe cirúrxica. | III |
Ecografía endoscópica | Indicada [B] | Necesítase un especialista. Se está dispoñible, pode ser a exploración inicial. Adoita utilizarse se a TC indica que o paciente é operable, para decidir a intervención cirúrxica máis apropiada. | 0 | |||
PET | Exploración especializada [B] | A PET utilízase para a avaliación previa á intervención cirúrxica de pacientes con cancro de esófago co fin de detectar as metástases. | IV | |||
Estómago | ||||||
L13 | D74 | Diagnóstico | Endoscopia / papa baritada | Indicada [B] | A endoscopia e o dobre contraste con papa baritada son igual de sensibles para realizar o diagnóstico do cancro de estómago avanzado. A endoscopia permite unha biopsia para histoloxía. | 0 / II |
L14 | D74 | Estadificación | TC | Indicada [B] | Actualmente a TC é a mellor exploración para a estadificación se se propón tratamento activo. A ecografía endoscópica é útil para a estadificación local. A laparoscopia é máis sensible para os depósitos peritoneais pequenos. | III |
Tumor primario do fígado | ||||||
L15 | D77 | Diagnóstico (Véxase tamén N33, N34, N35) |
Ecografía | Indicada [B] | A maioría das lesións identifícanse por ecografía. | 0 |
RM / TC | Exploración especializada [B] | Indicadas se os marcadores bioquímicos están elevados, a ecografía é negativa ou o fígado presenta unha cirrose avanzada. Unha RM con contraste e a TC en fase arterial son de gran precisión para delimitar a extensión do tumor. | 0 / III | |||
L16 | D77 | Estadificación | RM / TC | Indicadas [B] | A RM probablemente sexa a exploración idónea para avaliar os segmentos e lóbulos afectados. A TC arterioportografía e a ecografía intraoperatoria poden ser útiles se se dispón delas. | 0 / III |
Tumores secundarios do fígado | ||||||
L17 | D77 + TUMOR ORIGINAL A79 |
Diagnóstico | Ecografía | Indicada [B] | A ecografía mostra as metástases > 2 cm e serve para dirixir a biopsia. | 0 |
TC / RM | Indicadas [B] | Indicadas cando os achados da ecografía son negativos e a sospeita clínica é alta. A RM é mellor para caracterizar as lesións. A TC arterioportografía é sensible pero non específica. Moitos utilizan actualmente a TC helicoidal en tripla fase, tras inxección intravenosa de contraste. A TC e a RM adoitan formar parte doutros protocolos de estadificación e de seguimento. | III / 0 | |||
PET | Exploración especializada [C] | Indicada cando outras técnicas son dubidosas para descartar outras metástases previo a intervención cirúrxica. | IV | |||
Páncreas | ||||||
L18 | D76 | Diagnóstico | Ecografía / TC | Indicadas [B] | Depende moito dos recursos locais e da constitución física do paciente. A ecografía adoita dar bos resultados con pacientes delgados; a TC é mellor para os obesos. A biopsia pode ser guiada por ecografía ou por TC. A ecografía endoscópica é a máis sensible. | 0 / III |
RM / CPRM / CPRE | Exploración especializada [C] | A RM serve para a clarificación dos problemas. Poden ser necesarias tamén a CPRM e a CPRE. A PET está a adquirir cada vez máis relevancia. | 0 / 0 / II | |||
L19 | D76 | Estadificación | RM / TC | Indicadas [B] | Especialmente cando se pensa en cirurxía radical. Difiren moito as pautas locais: algúns servizos recorren á anxiografía, outros á TC helicoidal. | 0 / III |
PET | Exploración especializada [B] | De utilidade en casos nos que existe unha alta posibilidade de diseminación a distancia. | IV | |||
Ecografía endoscópica | Exploración especializada [B] | Debe reservarse para aqueles pacientes que están nos servizos especializados terciarios cuxa enfermidade se estima resecable en base á TC / RM. | 0 | |||
Colon e recto | ||||||
L20 | D75 | Diagnóstico | Enema opaco / colonoscopia | Indicadas [B] | Depende moito da dispoñibilidade de especialistas e equipos nos servizos locais. | III / 0 |
TC | Exploración especializada [C] | Está a aumentar o interese pola TC, especialmente para os anciáns e pacientes débiles. | III | |||
L21 | D75 | Estadificación | RXT, ecografía | Indicadas [B] | Para metástases hepáticas e pulmonares. A ecografía endoluminal é útil para ver a diseminación rectal local. | I, 0 |
TC, RM | Indicadas [B] | Estadificación local preoperatoria para avaliar as lesións rectais antes dunha radioterapia precirúrxica. Moitos hospitais tratan actualmente as lesións hepáticas secundarias de modo moi agresivo, o que pode requirir RM e/ou unha TC detallada. A RM e a TC son a miúdo complementarias e poden permitir avaliar outras diseminacións abdominais. O interese na PET está a aumentar. | III, 0 | |||
L22 | D75 | Seguimento | Ecografía | Indicada [B] | En caso de metástases hepáticas. A evidencia preliminar avala o seguimento rutineiro con técnicas de imaxe en pacientes asintomáticos. | 0 |
TC / RM | Indicada [B] | En caso de metástases hepáticas e de recidivas locais. | III / 0 | |||
PET | Exploración especializada [A] | A PET é a mellor técnica por imaxe para unha avaliación ante a sospeita de recidivas locais en pacientes con cancro colorrectal e utilízase para a avaliación de pacientes previamente a unha resección hepática por metástases. | IV | |||
Ril | ||||||
L23 | U75 | Diagnóstico | RXT | Indicada [C] | Para buscar metástases no pulmón. | I |
Ecografía | Indicada [B] | A ecografía é sensible á hora de detectar masas renais > 2 cm e caracteriza de forma precisa as masas como quísticas ou sólidas. A ecografía axuda a caracterizar algunhas masas indeterminadas coa TC. | 0 | |||
UIV | Non indicada [B] | É menos sensible que a ecografía para detectar masas renais. Non obstante, este é o método de elección para detectar carcinoma de células transicionais do sistema pielocalicial ou uréteres. | II | |||
TC | Indicada [B] | É un detector sensible de masas renais de entre 1,0 e 1,5 cm e caracteriza as masas de forma precisa. | III | |||
RM | Exploración especializada [B] | A RM con contraste é tan sensible como a TC con contraste para detectar e caracterizar masas renais. A RM debe usarse se as masas non están axeitadamente caracterizadas pola TC e a ecografía ou se está contraindicado o uso de contraste iodado por diminución da función renal ou alerxia a contrastes iodados. | 0 | |||
L24 | U75 | Estadificación | TC / RM | Indicadas [B] | A RM é mellor para detectar estadios avanzados, por exemplo, afectación da vea renal. A TC e a RM son equivalentes no estadio T1 da enfermidade. | III / 0 |
PET | Non indicada [C] | A evidencia actual con PET non mostra vantaxes para a estadificación ou a detección de carcinoma renal. | IV | |||
L25 | U75 | Recidiva | TC | Indicada [B] | Cando hai síntomas que suxiren unha recidiva no leito da nefrectomía. Non se recomenda o seguimento sistemático. | III |
Vexiga | ||||||
L26 | U76 | Diagnóstico | UIV | Indicada só en circunstancias específicas [B] | A cistoscopia é a exploración de elección para diagnosticar tumores na vexiga. | II |
Ecografía | Indicada só en circunstancias específicas [B] | Non é suficientemente precisa para avaliar tumores de vexiga pequenos (de menos de 5 mm), pero permite a avaliación do tracto superior. | 0 | |||
L27 | U76 | Estadificación | UIV | Indicada [B] | Para comprobar se nos riles e uréteres hai outros tumores uroteliais. | II |
RXT | Indicada [C] | Para buscar metástases no pulmón. | I | |||
RM | Indicada [B] | Sensible e específica, ademais de útil en caso de carcinoma de células transicionais. A TC é menos específica que a RM, pero pódese usar se a RM é impracticable. | 0 | |||
PET | Exploración especializada [C] | O seu papel esta aínda pendente de avaliación. | IV | |||
Próstata | ||||||
L28 | Y77 | Diagnóstico | Ecografía | Indicada [B] | Hai variacións, segundo a dispoñibilidade dos servizos locais e dos especialistas. A USTR (ecografía transrectal) utilízase moito xunto con biopsias guiadas. | 0 |
L29 | Y77 | Estadificación | RM | Exploración especializada [B] | Os protocolos de estudo e as pautas terapéuticas varían. A RM coas antenas apropiadas é sensible para a avaliación previa a unha posible prostatectomía radical. Se se atopa afectación pélvica, procédese á estadificación no abdome. A TC non ten ningún valor para a estadificación local. | 0 |
MN | Indicada [B] | Para avaliar as metástases óseas, cando o PSA (antíxeno prostático específico) está significativamente elevado. | II | |||
Testículo | ||||||
L30 | Y78 | Diagnóstico | Ecografía | Indicada [B] | Se existe a sospeita de tumor testicular e cando unha suposta enfermidade inflamatoria non responde ao tratamento. | 0 |
L31 | Y78 | Estadificación | TC de tórax, abdome e pelve | Indicada [B] | A TC é a técnica principal da estadificación, e no diagnóstico inicial debe incluír o tórax, o abdome e a pelve. Pódese omitir a pelve se todos os factores de risco, incluída unha afectación dos ganglios abdominais, foron descartados. No caso de tumores de células xerminais non seminomas, a TC torácica é máis sensible que a RXT á hora de detectar metástases no pulmón. | III - IV |
L32 | Y78 | Seguimento | TC | Indicada [B] | Se se descartaron os factores de risco de afectacións dos ganglios pélvicos, pódese prescindir da TC de pelve. A aparición de masas residuais pode servir para decidir se é necesario levar a cabo cirurxía. A RM non achega claras vantaxes sobre a TC, aparte de reducir a carga de radiación. A TC de zonas previamente afectadas pode poñer de manifesto evidencia morfolóxica de agrandamento das masas. | III - IV |
PET | Exploración especializada [B] | Cando un marcador aumenta tras tratamento, a PET-FDG con F-18 pode ser útil para identificar o lugar da recidiva. | IV | |||
Ovario | ||||||
L33 | X77 | Diagnóstico | Ecografía | Indicada [B] | A maioría das lesións de ovario identifícanse por medio de exames clínicos ou por ecografía. A ecografía transabdominal xunto á transvaxinal e a ecografía Doppler cor utilízanse para a súa avaliación. | 0 |
RM de abdome e pelve | Exploración especializada [B] | A RM permite resolver algúns problemas, porque é máis precisa que a ecografía para definir a presenza de malignidade. Nalgúns casos é necesaria a cirurxía para comprobar se se trata dun tumor benigno ou maligno. | 0 | |||
L34 | X77 | Estadificación | TC de abdome e pelve | Exploración especializada [B] | Moitos especialistas solicitan probas de imaxe para complementar a estadificación por laparotomía. | III |
RM de abdome e pelve | Exploración especializada [B] | A RM é de utilidade cando a TC con contraste está contraindicada, a paciente está embarazada ou para a resolución de problemas. | 0 | |||
PET | Exploración especializada [C] | Indicada en situacións de difícil manexo para avaliar a diseminación a distancia e local. | IV | |||
L35 | X77 | Seguimento | TC de abdome e pelve | Exploración especializada [B] | A TC / RM define a extensión, pero os achados normais non descartan a recidiva. A TC utilízase para avaliar a resposta ao tratamento. | III |
RM de abdome e pelve | Exploración especializada [B] | A RM é útil para a planificación cirúrxica e para resolver problemas. | 0 | |||
MN | Exploración especializada [C] | A exploración clínica e o radioinmunoensaio con soro Ca-125 úsanse para detectar unha recidiva. | II | |||
Colo do útero | ||||||
L36 | X75 | Diagnóstico | RM | Indicada só en circunstancias específicas [B] | O diagnóstico adoita ser clínico. A RM pode axudar en casos complexos. | 0 |
L37 | X75 | Estadificación | RM | Indicada [B] | A RM pon mellor de manifesto o tumor e a extensión local que a TC. Tamén é mellor para os ganglios pélvicos. Hai que explorar así mesmo os ganglios aórticos e os uréteres. Algúns servizos recorren actualmente á USTR (ecografía transrectal) para determinar a invasión local. | 0 |
PET | Indicada só en circunstancias específicas [C] | A PET é útil en casos difíciles para delimitar a extensión da afectación cun rexistro da imaxe. | IV | |||
L38 | X75 | Recidiva | RM de abdome e pelve | Exploración especializada [B] | A RM achega mellor información da pelve que a TC. A biopsia (por exemplo, de masa ganglionar) é máis doada dirixida por TC. | 0 |
Corpo do útero | ||||||
L39 | X77 | Diagnóstico | Ecografía / RM | Indicada [B] | A RM pode dar información útil sobre lesións benignas e malignas. | 0 / 0 |
L40 | X77 | Estadificación | RM | Indicada [B] | A RM é a técnica óptima para a estadificación do carcinoma endometrial. | 0 |
TC | Non indicada [B] | A TC ten un valor limitado para a estadificación local e é, polo tanto, pouco probable que inflúa no tratamento. | III | |||
Linfoma | ||||||
L41 | B72 | Diagnóstico | TC | Indicada [B] | O diagnóstico adoita realizarse por biopsia de extirpación dun ganglio linfático, pero a demostración por TC do aumento xeneralizado do tamaño dos ganglios pode suxerir o diagnóstico do linfoma. Para enfermidade limitada ao tórax permite a selección do lugar no que realizar unha biopsia guiada por imaxe. | III - IV |
MN | Exploración especializada [B] | A gammagrafía con Ga-67 pode poñer de manifesto focos de enfermidade oculta (por exemplo, mediastino). Nalgúns servizos utilízase a PET. | II | |||
L42 | B72 | Estadificación | TC | Indicada [B] | Segundo a localización, pode ser necesario explorar tamén a cabeza e o colo. | III - IV |
RM | Indicada só en circunstancias específicas [B] | Aínda que a RM non está indicada sistematicamente como unha proba de estadificación inicial, pon de manifesto as localizacións dos ganglios do mesmo modo que a TC e pode mostrar o grao de afectación da medula ósea, que ten consecuencias no prognóstico. | 0 | |||
PET | Exploración especializada [B] | A PET-FDG é tan precisa como a TC. | IV | |||
L43 | B72 | Seguimento | TC | Indicada [B] | A TC de áreas afectadas na estadificación da enfermidade de Hodgkin. Se existe sospeita clínica de recidiva ou progresión, é conveniente realizar unha exploración de tórax, abdome e pelve, especialmente en casos de linfoma non-Hodgkin. | III - IV |
RM | Non indicada nun primeiro momento [B] | A RM pode axudar a realizar a avaliación da natureza dunha masa residual detectada con TC. | 0 | |||
MN / PET | Exploración especializada [B] | Non existen moitos estudos comparativos da gammagrafía con Ga-67 e a PET-FDG. Está claro que a PET-FDG é máis sensible e específica que a gammagrafía con Ga-67, en concreto para masas pequenas e debaixo do diafragma. Coa gammagrafía con Ga-67 debe obterse unha imaxe previa ao tratamento. | III / IV | |||
RXT | Indicada [B] | Para a avaliación inicial de resposta en caso de enfermidade torácica, a RXT é totalmente apropiada. | I | |||
Tumores do aparato locomotor | ||||||
L44 | A79 L71 L97 | Diagnóstico (Véxase tamén a sección D) |
RX e RM | Indicadas [B] | As técnicas de imaxe e a histopatoloxía son complementarias. Mellor facelas antes de realizar unha biopsia. | I + 0 |
MN | Indicada [B] | Para asegurarse de que unha lesión é solitaria. | III | |||
L45 | A79 L71 L97 | Estadificación (Véxase tamén a sección D) |
RM e TC de tórax | Exploración especializada [C] | A RM é mellor para a extensión local. A TC utilízase para detectar metástases no pulmón. | 0 + III |
PET | Exploración especializada [C] | A PET é a mellor técnica por imaxe para detectar metástases orixinadas por un tumor primario descoñecido. | IV | |||
Metástases dun tumor primario descoñecido | ||||||
L46 | A79 | Diagnóstico dunha lesión primaria "Carcinoma, lesión primaria descoñecida" é un diagnóstico de exclusión e non un diagnóstico propiamente dito A análise histolóxica é a clave para identificar localizacións probables de tumores primarios e tumores tratables, por exemplo, linfomas, tumores de células xerminais e tumores primarios de cabeza e colo. A localización dunha metástase inicialmente identificada establece a orixe probable, por exemplo, unha afectación nos ganglios linfáticos cervicais superiores probablemente proveña de lesións na cabeza e o colo, unha afectación nos ganglios linfáticos axilares, dun carcinoma da mama, e células canceríxenas no líquido ascítico, dun carcinoma de ovario nas mulleres (Para o cancro de mama, véxase a sección J) |
RXT | Indicada [B] | A RXT pode axudar a identificar a orixe dun primario oculto. | I |
TC de tórax, abdome e pelve | Exploración especializada [B] | A TC é a exploración máis sensible para determinar o primario, o que pode permitir un tratamento eficaz, por exemplo, do cancro de pulmón e os seus coidados paliativos. Tamén permite o acceso a ensaios clínicos e achega vantaxes psicolóxicas incalculables para o paciente e para o médico. | IV | |||
Mamografía | Indicada só en circunstancias específicas [C] | Hai máis probabilidades de supervivencia a un cancro de mama se a metástase provén dun cancro de mama oculto. Incluso ante a presenza de metástase, vale a pena diagnosticar e tratar o cancro de mama. | I | |||
RM da mama | Exploración especializada [B] | A RM pode poñer de manifesto un carcinoma primario de mama con metástases dos ganglios linfáticos axilares a pesar de obter unha mamografía e unha ecografía normais. | 0 | |||
PET da cabeza e o colo, supradiafragmática ou do corpo enteiro | Exploración especializada [C] | Tras un proceso diagnóstico completo, incluídas a TC ou RM. | IV |