Resonancia magnética (RM)
En Europa, produciuse recentemente un considerable aumento do número de sistemas de RM, polo que existen numerosas recomendacións para o uso da RM. De feito, cos recentes avances técnicos e a maior experiencia, o papel da RM segue en aumento e o único factor que limita unha expansión maior é o económico.
Dado que a RM non utiliza radiacións ionizantes, debe preferirse esta técnica á TC, cando se dispón de ambas as dúas e ofrecen unha información similar. Non obstante, existe o risco dunha avalancha de peticións de RM non xustificadas, o que pode xerar longas listas de espera. Por iso, todas as peticións de RM se deberían consultar cun radiólogo.
Outros detalles:
- A RM adoita ofrecer máis información que a TC sobre patoloxías intracraniais, de cabeza e colo, vertebrais e do aparato locomotor, pola súa elevada sensibilidade de contraste e a capacidade de ofrecer imaxes en varios planos. Todo isto axuda os médicos a establecer un diagnóstico e un tratamento apropiado con maior grao de confianza e cada vez se utiliza máis en oncoloxía.
- Os principais avances recentes son: a RM da mama e a RM cardíaca; técnicas anxiográficas intervencionistas; colanxiopancreatografía por RM e outras técnicas de RM sensibles aos líquidos; RM cerebral funcional. Non obstante, moitas destas técnicas precisan aínda unha avaliación completa.
- Non está aprobada a RM durante o primeiro trimestre do embarazo, aínda que pode resultar máis inocua que algunhas das opcións alternativas. Todo estudo de imaxe nunha muller embarazada debe ser consultado co servizo de radioloxía.
- Hai algunhas contraindicacións claras da RM: corpos estraños metálicos na órbita, grampas de aneurismas intracerebrais, marcapasos, implantes cocleares etc. Por outro lado, a RM dá imaxes de calidade reducida en áreas próximas a unha prótese. Diversos libros de texto e monografías ofrecen a relación completa de contraindicacións. En caso de dúbida respecto ás contraindicacións é preciso consultar ao servizo de radioloxía antes de solicitar a exploración.