O tumor masculino máis frecuente en Europa, España e Galicia é o cancro de próstata (CPr). A súa taxa de incidencia en Galicia é de 157 casos/100.000 habitantes, supoñendo a terceira causa de morte por cancro en homes [Apéndice]. Estas cifras están en aumento, xa que a idade é un factor de risco (69 anos de media ao diagnóstico).
O diagnóstico tardío pode conducir a taxas máis altas de enfermidade metastásica. Non obstante, a alta sensibilidade da proba de PSA tamén provoca efectos indesexables, co sobrediagnóstico e o sobretratamento de cancros de baixo grado e crecemento lento, polo que impoñer un límite superior de idade para a detección (69 anos aprox.) e engadir probas máis específicas para homes con PSA positivo, permitirá mellorar o balance beneficio/risco.
Co obxectivo de diminuír a morbi-mortalidade por CPr nos países europeos mediante o deseño de programas de detección poboacionais adaptados ás características de cada poboación e utilizando un enfoque baseado no risco individual, Galicia foi invitada a participar nun proxecto liderado polo consorcio internacional PRAISE-U. Nel, a DXSP deseñará unha estratexia que permita a detección oportuna de xeito que os homes se beneficien do diagnóstico precoz. Esta estratexia implementarase nos pilotos de Galicia, Manresa, Lituania, Polonia e Irlanda que se iniciarán en abril de 2024 de xeito simultáneo cunha duración de 24 meses.
En Galicia invitarase a participar a uns 12.000 homes da AS de Ferrol de entre 50-70 anos. Nos casos con PSA elevada, realizarase unha estratificación do risco baseada en antecedentes persoais e familiares, así coma en probas complementarias, entre as que se atopa a ultrasonografía transrectal e a resonancia magnética multiparamétrica.
A finalidade será reducir o número de biopsias innecesarias e aumentar o rendemento desta proba, mellorando o seu valor preditivo positivo para o diagnóstico do CPr.