Uso prudente dos antibióticos

Uso prudente dos antibióticos

Para conmemorar o Día Europeo de Uso Prudente dos Antibióticos 2019, o 18 de novembro, o ECDC publica o “Informe sobre o coñecemento e as actitudes dos traballadores da saúde sobre o uso dos antibióticos e a resistencia aos antibióticos nos 30 países da UE/ EEE”. Comprender as barreiras para o uso prudente dos antibióticos é clave para poñer en marcha intervencións que aumenten a concienciación e o coñecemento, e cambien o comportamento sobre o uso dos antibióticos. Os resultados da enquisa apoian estratexias para o desenvolvemento de políticas, campañas de educación e comunicación dirixidas aos traballadores da saúde co obxectivo de abordar o uso prudente de antibióticos e a prevención e control da resistencia aos antibióticos na UE / EEE.

Por outra banda, a Organización Mundial da Saúde (OMS) celebra a Semana Mundial de Concienciación sobre Antibióticos 2019, do 18 ao 24 de novembro, co obxectivo de aumentar a concienciación mundial sobre a resistencia aos antibióticos e alentar as mellores prácticas entre o público en xeral, os traballadores da saúde e os que deciden as políticas para evitar a aparición e propagación da resistencia aos antibióticos. O lema é: “O futuro dos antibióticos depende de todos nós”.

 

Resistencia aos antibióticos: onde estamos agora?

Desde o seu descubrimento, os antibióticos foron unha pedra angular na medicina moderna. Con todo, o uso excesivo e o uso indebido de antibióticos na saúde humana e animal fomentaron a aparición e propagación da resistencia aos antibióticos, que acontece cando microbios, como as bacterias, se volven resistentes aos medicamentos utilizados para tratalos. A resistencia aos antibióticos limita, en gran medida, a cantidade de antibióticos dispoñibles para o tratamento dunha serie de enfermidades. Antes do descubrimento dos antibióticos, miles de persoas morrían por mor de enfermidades bacterianas, como pneumonías ou infeccións despois da cirurxía. Desde que se descubriron e utilizaron os antibióticos, cada vez máis bacterias, que orixinalmente eran susceptibles, volvéronse resistentes. Debido a que a resistencia está a aumentar e non se están a descubrir e comercializar poucos antibióticos novos nos últimos anos, a resistencia aos antibióticos é agora unha grande ameaza para a saúde pública. Sen antibióticos, poderiamos volver á "era pre-antibiótica", e logros da medicina como os transplantes de órganos, a quimioterapia, os coidados intensivos e outros procedementos médicos xa non serían posibles. As enfermidades bacterianas propagaríanse e xa non se poderían tratar, causando a morte. Só 70 anos despois da introdución dos antibióticos, enfrontámonos á posibilidade dun futuro sen medicamentos efectivos para tratar as infeccións bacterianas.

 

Contribúa a manter a eficacia dos antibióticos!!

Novamente este ano, con motivo da Xornada de Uso Prudente dos Antibióticos, o ECDC pídelle aos médicos, enfermeiras, xerentes de hospitais, farmacéuticos, granxeiros, veterinarios, lexisladores, organizacións profesionais e de pacientes, institucións gobernamentais e ao público en xeral, que compartan unha mensaxe vía Twitter, Facebook ou Instagram para explicar que están a facer para garantir que os antibióticos sigan a ser efectivos. Todos somos responsables de manter a eficacia dos antibióticos. Se desexa apoiar a campaña, comparta mensaxes, fotos ou vídeos durante a semana do 18 ao 24 de novembro de 2019, utilizando o hashtag # KeepAntibioticsWorking.

 

20191112_Uso_prudente_antibioticos.PNG