Decreto
160/1996, do 25 de abril, de configuración e introducción no Estatuto de
persoal non sanitario de institucións sanitarias da Seguridade Social da
categoría de persoal de servicios xerais.
A categoría que se constitúe refléctese no Decreto 200/1993, do 29 de xuño, de
ordenación da atención primaria na Comunidade Autónoma de Galicia, que, nos
seus artigos 2 e 3 refire dentro do persoal que presta servicios nas unidades e
servicios de atención primaria, creadas pola norma, ó persoal non sanitario e
de servicios xerais.
A introducción desta clase de persoal no decreto obedeceu á
consideración da necesidade de dispoñer dun persoal, dalgún xeito polivalente,
para prestar servicios nas novas unidades e servicios de atención primaria. Tal
persoal aglutinaría funcións, fundamentalmente, das categorías estatutarias de
auxiliar da función administrativa e celador.
As dúas categorías estatutarias sinaladas, de xeito separado
e sen a simbiose propugnada, resultan inadecuadas para a prestación de
servicios que, por esta clase de persoal, se pretende desenvolver nas aludidas
unidades e servicios de atención primaria. Por iso, unha nova categoría que
comprenda no seu ámbito funcións correspondentes ás dúas categorías mentadas en
plena interdependencia, parece óptima para tratar de cubri-las necesidades existentes,
cun maior nivel de garantía.
A posibilidade de creación de novas categorías estatutarias
que se inclúan no estatuto pertinente, vén explicitamente recollida no Real
decreto 118/1991, do 25 de xaneiro, sobre selección e provisión de prazas de persoal
estatutario de área.
Así, en efecto, a disposición transitoria adicional terceira
da norma dispón que «la creación, supresión, unificación o modificación de
categorías se efectuará en cada Administración Pública, mediante norma del
rango que, en cada caso, proceda, preva negociación en la correspondiente Mesa
Sectorial».
Por iso, de acordo co precepto trascrito, procedeuse á
negociación no marco da Mesa Sectorial de persoal sanitario, coas organizacións
sindicais integrantes da mesma.
Así mesmo, a presente disposición normativa ten como
virtualidade a introducción da nova categoría no Estatuto de personal non
sanitario.
Na súa virtude e logo da negociación coas organizacions
sindicais presentes na Mesa Sectorial de Negociación de persoal sanitario ó
servicio da Comunidade Autónoma, por proposta da Consellería de Sanidade e
Servicios Sociais e logo do informe das Consellerías da Presidencia e
Administración Pública e Economía e Facenda, logo de deliberación do Consello
da Xunta de Galicia na súa reunión do día vintecinco de abril de mil novecentos
e seis,
DISPOÑO:
1. Créase a
categoría estatutaria de persoal de servicios xerais que se inclúe dentro das
de persoal non sanitario que integran o grupo D segundo o establecido no Real
decreto-lei 3/1987, do 11 de setembro, sobre retribucións de persoal
estatutario do Instituto Nacional da Saúde.
2. A dita
categoría engádese á relación de categorías estatutarias regulamentadas polo
Estatuto de persoal non sanitario ó servicio das institucións sanitarias da
Seguridade Social.
3. Funcións:
As funcións que desenvolverá esta categoría de persoal, coa
garda imprescindible do deber de sixilo e respecto á confidencialidade no seu
cometido, incluiranse en tres áreas:
a) Administrativa e de apoio á xestión,
b) De recepción, atención e información ós usuarios,
c) De mantemento e apoio ás funcións xerais.
a) Dentro da primeira área o cometido concretaríase no apoio
á xestión administrativa e organización do traballo das unidades e servicios
respectivos.
Como funcións desta área procede refer-las seguintes:
- Materialización do programa da cita previa.
- Cumprimentación dos datos administrativos dos usuarios nas
follas de asistencia sanitaria e de atención urxente.
- Vehiculación das follas de asistencia médica e historias
clínicas.
- Tramitación dos pedidos de material necesario para o
servicio ou unidade.
- Levar a efecto, baixo a supervisión e dirección de quen
competa, a adecuada ordenación, mantemento e xestión do arquivo de historias
clínicas.
- Mecanización e transcrición dos informes administrativos e
clínicos.
- Calquera outras de análogo contido ou que teña relación
coas funcións administrativas e de apoio á xestión.
b) No que respecta á segunda área indicada, as funcións que
se desempeñarán serán as relativas á recepción, información e atención precisa
ós usuarios das unidades e servicios correspondentes segundo os criterios e
directrices establecidos.
Como funcións desta área cabe sinalar:
Atención e apoio físico ós usuarios cando resulte preciso.
- Información ós usuarios da carteira de servicios
asistentes.
- Atención telefónica coa información precisa.
- Execución, baixo as directrices e supervisión procedentes,
do programa da tarxeta sanitaria.
- Calquera outra de análogo contido ou que teña relación coa
recepción, atención e información ós usuarios.
c) Finalmente, dentro da terceira área encadraranse as
funcións de mantemento e control das instalacións, na procura de que estas
evidencien un aspecto idóneo e sirvan perfectamente para o cumprimento dos seus
fins.
Dentro delas refírense as seguintes:
- Apertura e pechamento das unidades e servicios.
- Procura-lo correcto funcionamento das instalacións,
solicitando os servicios do persoal de mantemento cando a complexidade da
reparación o requira.
- Control das instalacións e vixilancia da adecuada limpeza
destas durante a xornada laboral.
- Calquera outra de análogo contido ou que teña relación co
mantemento e apoio ás funcións xerais.
4. Retribucións.
As retribucións que percibirá o persoal de servicios xerais
serán as que se establecen na norma de ordenación do sistema retributivo de
atención primaria para esta categoría de persoal.
DISPOSICIÓN TRANSITORIA
As prazas cubertas por persoal con vínculo temporal que,
polas súas características de necesaria atención polivalente nas unidades ou
servicios de atención primaria, se considere oportuno, poderán transformarse en
prazas de persoal de servicios xerais co asinamento dun contrato destas
características polos profesionais que actualmente as veñen desempeñando.
DISPOSICIÓN DERROGATORIA
Quedan derrogadas cantas normas de igual ou inferior rango
se opoñan ó establecido no presente decreto.
DISPOSICIÓN DERRADEIRA
Primeira.- Autorízase a Consellería de Sanidade e Servicios
Sociais para dicta-las ordes e adopta-las medidas necesarias para o
desenvolvemento e execución do presente decreto.
Segunda.- O presente decreto entrará en vigor o día seguinte
ó da súa publicación no Diario Oficial de Galicia.