A meta do Programa Galego de Prevención e Control da Tuberculose é reducir a morbilidade e transmisión da TB, mantendo a tendencia decrecente da incidencia de casos de TB, en todas as súas formas, favorecendo o acceso universal a un diagnóstico de calidade e tratamento efectivo dos enfermos de TB, co fin de reducir o sufrimento humano e a carga socioeconómica asociados, mediante a aplicación de accións efectivas tendentes a protexer e atender con calidade e calidez as poboacións susceptibles.

Un dos piares fundamentais da loita antituberculosa é a actuación sobre o contorno familiar e social de cada enfermo. Sábese que ao redor de vinte persoas poden ser infectadas por cada enfermo bacilífero, e máis canto máis íntima sexa a convivencia. Dos infectados, nunha porcentaxe apreciable, do 5 ao 20% das persoas, van desenvolver a enfermidade tuberculosa.

Un dos factores que contribuíu á situación actual da TB en Galicia foi a creación do Laboratorio de Referencia de Micobacterias de Galicia, que fixo posible a nosa incorporación ao proxecto global da OMS de vixilancia de resistencias aos fármacos antituberculosos, e a realización de antibiograma a todos os casos de tuberculose.

Os traballadores sanitarios que atenden a persoas con TB bacilífera deben coñecer o nivel de risco de transmisión da enfermidade e as medidas de control adecuadas para minimizar ese risco.