Campaña 2019 - Consellería de Sanidade - Servizo Galego de Saúde

En 2019, a Consellería de Sanidade aprobou dúas prestacións sanitarias dirixidas a homes que teñen sexo con homes:

1. Vacinación de:

virus do papiloma humano (VPH) (ata os 45 anos)
virus da hepatite A
virus da hepatite B

2. Aprobación do uso da profilaxe pre-exposición ao VIH (PrEP).

Vacina do virus do papiloma humano (VPH)

Estímase que o virus do papiloma humano (VPH) é o axente causal do 5% dos casos de cancro, sendo causa necesaria para o desenvolvemento de cancro cervical e responsable tamén doutros cancros de menor incidencia, como o de vulva, vaxina, pene, ano e orofarinxe, de aí a importancia da súa prevención.

Existen moitos tipos de virus VPH, non todos oncoxénicos (que produzan cancro), que se identifican cun número. Entre os VPH de alto risco oncoxénico destacan o 16 e 18, responsables do 70% do total do cancro cervical, e existen ademais outros tipos oncoxénicos, como o 31, 33, 45, 52 e 58, que representan unha porcentaxe non desprezable no número total de casos de cancro por este virus.

A Consellería de Sanidade emprega a vacina nonavalente Gardasil 9®, do laboratorio MSD, que contén na súa composición os virus de alto risco 16, 18, 31, 33, 45, 52 e 58, ademais dos virus non oncoxénicos 6 e 11 responsables das verrugas xenitais.

En Galicia, os homes que teñen sexo con homes teñen indicada a vacina do VPH ata os 45 anos. Podes achegarte á túa consulta médica e solicitar a vacina de xeito totalmente gratuíto. A pauta desta vacina require poñer tres doses.

Para máis información sobre esta indicación, pinche aquí: https://www.sergas.es/Saude-publica/Documents/6140/Vacinacio%CC%81n%20en%20grupos%20de%20risco_agosto2019%20.pdf

Profilaxe pre-exposición ao VIH

A profilaxe pre-exposición (PrEP) é unha intervención biomédica dirixida a previr a transmisión da infección polo virus da inmunodeficiencia humana (VIH) en persoas seronegativas para o VIH que teñen un elevado risco de contraer a infección. A pauta aprobada pola Axencia Europea do Medicamento (AEM) consiste na administración diaria dunha pílula, que contén dous fármacos antirretrovirais, Tenofovir disoproxil fumarato (TDF) e Emtricitabina(FTC), antes da exposición ao VIH.

A quen vai dirixida a PrEP?

1. Homes que teñen sexo con homes (HSH) e persoas transexuais seronegativas para o VIH, adultas (≥ 18 anos), que cumpran, polo menos, con dous dos seguintes criterios:

Máis de 10 parellas sexuais diferentes no último ano
Practicar sexo anal sen protección no último ano
Usar drogas en relación co mantemento de relacións sexuais sen protección no último ano
Administración da profilaxe post-exposición ao VIH en varias ocasións no último ano
Ser diagnosticado polo menos dunha ITS bacteriana no último ano

2. Persoas que exercen a prostitución seronegativas para o VIH que refiran un uso non habitual do preservativo.

En que consiste a participación no programa da PrEP?

Neste programa farase unha primeira valoración para comprobar que a persoa cumpre cos requisitos do programa e solicitaránselle as probas necesarias para descartar a infección polo VIH, outras ITS e un bo estado de saúde para recibir a PrEP.

Unha vez que a persoa estea incluída no programa recibirá a PrEP no Servizo de farmacia hospitalaria do hospital no que se encontre a consulta de VIH que lle faga o seguemento do programa da PrEP.

A participación neste programa implica o compromiso dunha boa adherencia ao tratamento e revisións médicas cada 3 meses. En todas as consultas de seguimento farase consello preventivo sobre as prácticas de risco e detección precoz doutras infeccións de transmisión sexual como a sífilis, a gonococia ou a clamidiase.

Como se pode solicitar en Galicia?

A persoa que desexe participar no programa da PrEP debe solicitar unha cita na súa consulta médica de Atención Primaria ou na consulta hospitalaria de VIH de calquera dos 7 grandes hospitais galegos do Servizo Galego de Saúde. A cita nas consultas hospitalarias de VIH pode solicitarse chamando por teléfono a calquera destas consultas.

Se tes prácticas sexuais de risco, podes solicitar a inclusión no programa da PrEP pedindo unha cita en calquera das seguintes consultas de VIH do Servizo Galego de Saúde:

Complexo Hospitalario Universitario de Ferrol

Hospital Arquitecto Marcide

Avda. Residencia, s/n. 15405. Ferrol (A Coruna)

Tfno: 981 337 855

Complexo Hospitalario Universitario da Coruna

Hospital Universitario da Coruña

Lugar Xubias de Arriba, 84. 15006. A Coruna (A Coruna)

Tfno: 981 178 394

Complexo Hospitalario Universitario de Santiago

Hospital Clínico de Santiago

Rua da Choupana, s/n. 15706. Santiago de Compostela (A Coruna)

Tfno: 981 951 266