Das 497 zonas de baño incluídas no programa e sometidas a control sanitario na tempada 2010, o 98,8% foi cualificado como apto para o baño.

A vixilancia e control sanitario tivo lugar no 99,6% das zonas de baño censadas. O cumprimento do programa foi axeitado cun índice de produción de mostraxes do 99,1%.

Dende o inicio da tempada informouse da cualificación sanitaria das augas de baño na nosa páxina web e mantívose a periodicidade quincenal das mostraxes. Ao final da tempada, os valores microbiolóxicos foron introducidos no sistema de información nacional de augas de baño (Náyade), que pode consultar toda a poboación a través do acceso ao cidadán.

Pódese concluír, de xeito xeral, que o grao de cumprimento do Programa de vixilancia sanitaria das zonas de baño da tempada 2010 foi satisfactorio.

É necesario establecer actuacións para mellorar a calidade da auga das zonas de baño onde é previsible que se obteña cualificación sanitaria insuficiente, segundo a Directiva 2006/7/CE no ano 2011. Tendo en conta a cualificación sanitaria obtida mediante o sistema de cálculo da Directiva 2006/7/CE, o 10,1% das zonas de baño sería cualificado como insuficiente, o que supón 48 zonas de baño máis das que foron cualificadas como non aptas para o baño co sistema de cálculo da Directiva 76/160/CEE.