Resolución do 11 de decembro de 2007, da División de Recursos Humanos e Desenvolvemento Profesional, pola que se fan públicos os acordos dos tribunais que xulgan o proceso selectivo para o ingreso en determinadas categorías de persoal estatutario do Servizo Galego de Saúde, relativo á puntuación definitiva, á conclusión da fase de oposición e á apertura do prazo da fase de concurso.

O número 1 da base sexta B) da resolución da Secretaría Xeral do Servizo Galego de Saúde do 8 de agosto de 2006 (DOG nº 156, do 14 de agosto), pola que se convoca concurso-oposición para o ingreso en determinadas categorías de persoal estatutario do Servizo Galego de Saúde, dispón que, rematada na súa totalidade a fase de oposición, o tribunal publicará un acordo no Diario Oficial de Galicia, no que se declarará rematada a fase de oposición e se abrirá un prazo dun mes, contado a partir do seguinte ao da súa publicación, para que estes aspirantes acheguen a documentación acreditativa dos méritos que aleguen.

Ademais, o punto 11 da base sexta A) establece que tras a publicación das puntuacións dos exercicios, os aspirantes poderán presentar reclamación ante o tribunal no prazo de cinco días hábiles seguintes ao da devandita publicación.

A estimación ou desestimación destas reclamacións entenderase implícita na resolución pola que se publiquen as puntuacións definitivas dos distintos exercicios.

Á vista das reclamacións presentadas en prazo ao terceiro exercicio, cada tribunal confirmou as listaxes de puntuacións definitivas outorgadas aos aspirantes.

Adoptado acordo de finalización da fase de oposición polos respectivos tribunais, procede agora darlle publicidade no Diario Oficial de Galicia, facultándose para iso expresamente esta División de Recursos Humanos e Desenvolvemento Profesional do Servizo Galego de Saúde, polo que,

RESOLVO:

Primeiro.-Publicar as puntuacións definitivas do terceiro exercicio acadadas polos aspirantes das categorías de cociñeiro, do grupo auxiliar da función administrativa e de persoal de servizos xerais de persoal estatutario do Servizo Galego de Saúde, convocado pola resolución da Secretaría Xeral do Servizo Galego de Saúde do 8 de agosto de 2006 (DOG nº 155, do 14 de agosto).

A estimación ou desestimación das devanditas reclamacións entenderase implícita nesta resolución de publicación.

Segundo.-Declarar rematada a fase de oposición destas categorías e publicar a relación alfabética e a relación pola orde de puntuación alcanzada no conxunto dos exercicios dos aspirantes que superaron a fase de oposición das citadas categorías, nos taboleiros de anuncios dos servizos centrais e periféricos da Consellería de Sanidade e do Servizo Galego de Saúde e na súa páxina web: www.sergas.es.

Terceiro.-Abrir o prazo desde o día seguinte ao da publicación desta resolución até o día 31 de xaneiro de 2008, para que estes aspirantes presenten a documentación acreditativa dos méritos que aleguen nos seguintes lugares:

a) Na Secretaría Xeral da Consellería de Sanidade.

b) Na División de Recursos Humanos e Desenvolvemento Profesional do Servizo Galego de Saúde.

c) Nas delegacións provinciais da Consellería de Sanidade.

d) Nas direccións provinciais do Servizo Galego de Saúde.

e) Nos servizos de persoal dos centros ou complexos hospitalarios da rede pública do Servizo Galego de Saúde.

f) Nos servizos de persoal das administracións dos centros de xestión de Atención Primaria do Servizo Galego de Saúde.

g) A través de calquera dos procedementos do artigo 38 da Lei 30/1992, do 26 de novembro, modificada pola Lei 4/1999, do 13 de xaneiro, de réxime xurídico das administracións públicas e do procedemento administrativo común.

Cuarto.-Todos os aspirantes que superasen a fase de oposición, deberán achegar no modelo contido no anexo desta resolución os méritos que aleguen xunto coa fotocopia compulsada do seu DNI, así como a seguinte documentación, pois do contrario quedarían excluídos do proceso selectivo:

a) Fotocopia compulsada do título exixido para o ingreso na correspondente categoría;

b) Os participantes que accedan polas quendas de promoción interna e de discapacitados deberán achegar, ademais da documentación anterior, orixinal ou certificación compulsada acreditativa, segundo os requisitos descritos nos puntos 2 e 3 da base segunda da convocatoria.

Santiago de Compostela, 11 de decembro de 2007.

Antonio José Fernández Paniagua

Director xeral de Recursos Humanos e Desenvolvemento Profesional