¿En
que consiste?
O estrinximento consiste en deposicións infrecuentes
e dificultosas ou mesmo dolorosas. Algunhas persoas cren que
deben ter unha evacuación intestinal tódolos días,
pero isto non é así necesariamente, senón
que a frecuencia das deposicións varía entre persoas.
En xeral o estrinximento é un problema de carácter
benigno relacionado cun xénero de vida caracterizado
fundamentalmente por falta de exercicio e unha dieta inadecuada.
De tódolos xeitos, teña en conta que pode deberse
a outras causas, como por exemplo o consumo de certos medicamentos,
polo que é importante consultalo co seu médico.
¿Como se trata?
Tomar
suficiente líquido, como mínimo un litro e medio
ó día e preferiblemente de auga. Isto é
especialmente importante nas persoas de idade, que frecuentemente
non senten sensación de sede. Unha forma práctica
consistiría en planifica-la cantidade mínima de
líquido (exemplo unha botella ou xerra) que se deberá
beber ó longo do día.
Aumenta-la
toma de alimentos ricos en fibra para lograr un maior volume
das feces. A fibra de trigo, as froitas e en xeral, os vexetais,
son os alimentos máis recomendables.
Realizar
exercicio físico regular: camiñar xornadas diarias
de 45 ou máis minutos, un mínimo de tres veces
por semana.
Determinadas medidas posturais como por exemplo eleva-los pés
20 cm poden favorece-la defecación.
Tentar
adquirir unha “disciplina” na defecación,
procurando facelo tódolos días e á mesma
hora, (preferiblemente despois do almorzo) e dándose
suficiente tempo.
Ademais,
deberase acudir ó aseo no momento en que se produzan
as ganas de defecar, evitando atrasalo para outro momento.
Non
se automedique con laxantes xa que algúns poden ter efectos
indesexables ou contraindicacións dependendo do seu caso
particular. Ademais, é habitual que o seu uso continuado
lles reste efectividade. Consulte co seu médico.
En
ocasións poden ser útiles remedios caseiros como
a inxestión en xaxún de auga morna ou zume de
froitas.
Alimentos Recomendados
Froitas:
laranxas, peras, mazás, ameixas, figos, uvas, etc.
Verduras e hortalizas: vexetais verdes e algunhas
raíces como as cenorias e as patacas.
Grans, noces e legumes (chícharos, garavanzos,
fabas).
Tome polo menos 5 porcións de froita e vexetais ó
día, por exemplo 2 ou 3 pezas de froita e 2 ou 3 porcións
de verduras ou hortalizas ó día. Substitúa
o pan branco por pan integral. Consuma pasta e arroz integrais.
Incorpore suplementos de fibra á súa dieta habitual,
en forma de cereais comerciais integrais ou engadindo directamente
farelo de trigo a iogures ou compotas. Teña presente
que o aumento de fibra na dieta deberase facer gradualmente,
é dicir, pouco a pouco.
Situacións
especiais:
-Cambio brusco no hábito intestinal en persoas que nunca
foron estrinxidas, especialmente se se acompaña doutras
manifestacións como por exemplo vómitos, falta
de apetito ou perda de peso.
-Estrinximento nas persoas encamadas ou relacionado con fármacos.
Lembre: unha alimentación equilibrada rica en
fibra, inxerir abundantes líquidos, realizar
exercicio físico regular e adquirir unha disciplina
na defecación son medidas fundamentais no control
do estrinximento
|
ESTAS MEDIDAS SON RECOMENDACIÓNS XERAIS. NON
DUBIDE EN CONSULTAR CO SEU MÉDICO. EL PODERÁ
MODIFICALAS E AXUSTALAS ÁS SÚAS CONDICIÓNS
CONCRETAS.
|