As respostas que se formulan no marco do Plan de Trastornos Adictivos de Galicia 2011-2016 para facer fronte ás adiccións fundaméntanse no establecido na Lei 2/1996, do 8 de maio, de Galicia sobre drogas, na Lei de prevención do consumo de bebidas alcohólicas en menores de idade, na Estratexia Europea en Materia de Loita Contra as Drogas e na Estratexia Nacional sobre Drogas.
Os principios que orientan este plan son os seguintes:
Adaptación ao horizonte temporal marcado pola Estratexia Nacional sobre Drogas.
Coordinación intersectorial.
Corresponsabilidade: sen prexuízo da especial responsabilidade que deben asumir os poderes públicos, a intervención sobre as condicións que favorecen o consumo de drogas e as súas consecuencias concirne a toda a sociedade.
Participación social na planificación e execución das respostas que se deben dar fronte ás adiccións.
Normalización: as respostas que se deben arbitrar fronte ás adiccións basearanse na utilización preferente dos recursos sanitarios, sociais, educativos, de emprego, etc. existentes na comunidade.
Prioridade das intervencións preventivas.
Promoción de hábitos de vida saudables e dunha cultura de saúde.
Abordaxe integral das adiccións: inclusión de intervencións en materia de redución da demanda e da oferta, asistencia e incorporación social. Accesibilidade aos servizos.
Inclusión da perspectiva de xénero en todas as actuacións para desenvolver en materia de investigación, prevención, asistencia e incorporación social: homes e mulleres asumen comportamentos e riscos diferentes respecto das adiccións que requiren de respostas diferenciadas.
Respostas baseadas na evidencia científica dispoñible.
Avaliación continuada dos resultados e impacto das medidas adoptadas. Aseguramento da execución mediante a consignación orzamentaria correspondente por parte da Xunta de Galicia.Todas as actividades derivadas do desenvolvemento deste Plan adheriranse ás políticas de eficiencia, austeridade e mellora da xestión que marque a Xunta de Galicia.