Sistema Operativo, de libre distribución, especialmente orientado á utilización de ferramentas de análise de datos para a realización de estudos epidemiolóxicos, bioestatísticos e de saúde en xeral.
[Maio 2021 - Nova versión 6.0 xa dispoñible]
Dous dos retos actuais, en canto á utilización de software como base para a realización de estudos científicos, son a posibilidade de acceso ao código fonte para poder reutilizalo, modificalo ou distribuílo e a redución de custos por licenza de uso. Por desgraza, a maioría de solucións privativas non contemplan estes aspectos: adoitan ser solucións de código pechado, con custos elevados nas súas licenzas e estas, nalgúns casos, ata teñen limitacións temporais.
EpiLinux é un sistema operativo completo baseado en GNU/Linux. Este contorno otórgalle un excelente rendemento e lixeireza, ademais dunha gran usabilidade. Desde a primeira versión, nace coa idea de ser un sistema que facilite a posibilidade de utilizar software de fontes abertas e, ademais, gratuito. Está especialmente orientado a todas aquelas persoas, tanto profesionais como estudantes, que desenvolvan as súas actividades nos campos da epidemioloxía a bioestatística e os estudos de saúde en xeral. Nesta versión, recompilouse e configurouse, nunha mesma distribución e nun novo contorno, o software necesario para iso. Esta distribución aporta un conxunto de programas de uso xeral (ofimática, multimedia, internet, ...) e unha recompilación de software científico. Entre eles, podemos destacar R cos seus contornos gráficos Rcommander e Rstudio e unha colección preinstalada de librarías especializadas. Ademais, inclúese software de referencia no campo da Epidemioloxía como Epidat 4, OpenEpi e, como Sistema de Información Xeográfica, QGIS.
Actualízase desde os repositorios orixinais destes programas o que consegue que o sistema dispoña das últimas versións en todo momento e ofrece a posibilidade de executalo desde un pendrive USB en modo "live" evitando, así, a interacción con instalacións previas doutros Sistemas Operativos. Outra opción é executalo desde unha máquina virtual, integrado nun sistema operativo anfitrión. Tamén se pode instalar no disco duro do equipo como única opción en modo compartido con outro sistema.
A nova versión de EpiLinux permite dispoñer, nun contorno totalmente configurado, actualizado, homoxéneo, de libre distribución e gratuito, das ferramentas necesarias para a realización de estudos epidemiolóxicos e/ou bioestatísticos.
Coa colaboración de: